يوميات بريزة فضة ..13

يوميات بريزة فضة 13

انا جيييييييييييييييييييييييت

بريزة مش زي أي بريزة
بريزة ...... عزيزة ..... لذيذة
ومعاكم حصرياً
وحشتوني وحشتوني وحشتوني

ياااااااااااااااااااااااااااااااااااااااااااااه
كام ثانية عدّت من غير ما اكلمكم واحكيلكم
بس بيني وبينكم..... قضيت اجازة آخر دلع
زي ما بعضكم عرف من هاني صاحبي قضيتها في خزنة بنك سويسري على البحر مباشرة ودي كانت هدية من احد رجال الاعمال المشتركين على الجروب بس خلصت بسرعة بسرعة
وررررررررررررجعتلكم تاني
والنهاردة وبمناسبة الامتحانات
هاحكيلكم

*
الغش مش والنجاح عسل

*

الموضوع وما فيه
ان انا وصلت لايد امينة وامينة دي بنت في تالتة تجارة بس اسمها لا يمت باي صلة لتصرفاتها امينة دي يا اصحابي كانت محترفة غش آخر صيحات الموضة في الغش تشوفها مع امينة اشي رسم المخططات على الجيبة
واشي حفر القوانين على الآلة الحاسبة من جوة واشي حشو المناديل الورق ببقية المنهج
م الاخر كانت بتدخل الامتحان ملغمة
ومن حظي الكويس اني وصلت لها قبل بداية الامتحانات بيومين وطبعاً امينة ما كانتش بتذاكر زي بقية الطلبة امينة كانت بتعمل براشيمها المتخصصة
وشفت وانا فوق مكتبها آخر اختراعاتها تصوير قوانين على سلك سكرين ولزقه على عدسات النظارة آه والله عدسات النظارة
وقعدت تجرب تلبس النظارة وتقربها وتبعدها عشان تجرب اذا كانت هتشوف وللا لأ وهي بتجربها بصت عليه ولأن النظارة عليها كتابة هية شافت الكتابة عليه انا
واللمبة نورت في نافوخها
وبدل ما تحط السلك سكرين على النظارة حطته عليه انا
وقعدت تساوي عشان ما يبانش وعلى الرغم من انا كنت مخنوقة م التغليف اللي انا اتغلفته
بس كانت دماغي بتفكر في بكرة ولجنة الامتحان ومين عارف مش يمكن تتقفش بيه واتحرز تاني
لأ لأ لأ بلاش السيرة دي
المهم رحنا الامتحان الصبح وامينة ملغمة كالعادة والبرشام يملأ جنباتها في الطرحة وعالجيبة وعالكوتشي وفي حتت مستخبية ممنوعة من الصرف
وصاحبتنا خدت موقعها في الجبهة قصدي في اللجنة
وبدأت ترص أسلحة الغش
المسطرة والقلم وبقية الأدوات المكتوب عليها وانتظرت ورقة الامتحان
بيني وبينكم انا كنت ميتة م الخوف وقلبي الفضي الجميل كان بيدق زي الجرس
وجت الورقة
وابتدت صاحبتنا تنقش وبنت اللذينا ذاكرتها حديد وعارفة كل كلمة جاية في الامتحان محطوطة فين معاها يعني لو كانت ذاكرت كانت تطلع م الاوائل
وجينا للجد المراقب بدأ ياخد باله م الحركات الغريبة ولأنه شاب مراهق من شئون الطلبة ما لفتش انتباهه غير ان امينة لابسة جيبة قصيرة و صاحبنا سرح في الجيبة ولا خد باله الاهبل من امينة وهية بتظبط امورها
وفجأة
جيه رئيس اللجان وخد باله من ان المراقب الكتكوت بيبص لأمينة وسرحان وقبل ما يروح يهزأه بص هو كمان لأمينة بس ما بصش لجيبتها رئيس اللجان بص على امينة وهية بتمقق في اللي مكتوب عليّه
يا نهار مخطط ..ده جاي علينا بيقرب... بيقرب
انت يا بنت
رئيس اللجان قالها لأمينة وأمينة اتفزعت واتنترت انا من ايدها وكل الطلبة بصوا عليه وانا قعدت اتدحرج عالأرض لغاية ما وصلت تحت رجلين كريم اللي عرفت بعد كده انه الاول عالدفعة ومجتهد جداً وعمره في حياته ما غش كلمة واحدة ولأن كريم كان في لجنة تانية كان مش واخد باله م اللي بيحصل وأول ما خبطت في رجله بص عليه ببراءة ورفعني وبص فيه و.....
قفشتك
كان د. عبد المهيمن رئيس اللجان مشي ورايا وعرف انا وصلت لمين وراسه وألف جزمة (لا مؤاخذة)
ان كريم وامينة متفقين وبيتبادلوا ادوات الغش
وان البريزة دي مغشوشة قصدي مغشوش فوقيها
طبعاً كريم اتخض والدنيا ضلمت في وشه وحس ان مستقبله ضاع
هات البريزة دي
انا هاوديكم في داهية
وكريم مد ايده وهية بتترعش واداني ل د. عبد المهيمن وهو مش دريان بالدنيا و..... عجيبة البريزة دي مش مكتوب عليها حاجة أنا آسف يا بني ظلمتك اقعد كمل اجاباتك خد بريزتك
اكيد البريزة اللي مكتوب عليها راحت كدة وللا كدة عموماً البنت اللي كانت بتغش طلع معاها براشيم تكفي اللجنة واللجان المجاورة وهيتعمل لها محضر غش
وعلى الرغم ان كريم ما كانش فاهم حاجة تقريباً
الا ان انا طبعاً كنت عارفة كل حاجة زي العادة
الموضوع وما فيه ان د. عبد المهيمن أول ما شخط في كريمة اترجفت ووقعت من ايدها وعشان انا كمان اترجفت وارتعدت بشدة وسخنت في لحظة وجاتلي كل اعراض الملاريا لقيت السلك سكرين اتقشر من عليه ووقع عالأرض وانا باتدحرج في الطريق لكريم
ولما رئيس اللجان اداني لكريم كريم خاف طبعاً يقول مش بتاعتي وما صدق الموضوع خلص وحطني على الدرج وفضل طول الامتحان ما لمسنيش
ولأن كريم مجتهد ما كانش بيسيب أي كلمة أو نقطة في الاسئلة من غير ما يحلها ومقابل كده كان ممكن يخرج آخر واحد من اللجنة
المهم كريم كان فاضل له نقطة واحدة في السؤال الاختياري صح أو غلط وكان بيحاول يفتكرها مش قادر
وقبل انتهاء الوقت بدقيقة واحدة لمعت في دماغه حتة فكرة
ولقيته بيمسكني وبيرميني في الهوا لفوق وبيلقطني تاني وأول ما بص فيه كنت وقعت على الكتابة
ولقيته بيحط علامة صح في كراسة الاجابة ودق الجرس واتلم الورق وأول ما طلع كريم جري على الكتاب بتاعه وبص واطلق صيحة النصر
أصله لما يئس من انه يفتكر الاجابة فكـّر انه يلعب بيّه رفـّة عالاجابة وبالصدفة الاجابة طلعت صح
وكريم زي العادة طلع الاول ولو تفتكروا في أول اليومية كان في حد اسمه امينه
ربنا ما يوريكوا اللي شافته

اصحابي وصاحباتي

ذاكروا كويس.....واعتمدوا على نفسكم وبس وتوكلوا على الله وان شاء الله ربنا هيساعدكم واياكم تغشوا اديكم شفتم مصير الغشاشين وبلاش موضوع الرفـّة ده كمان
مش كل رفـّة تنتهي بزفـّة قصدي مش كل مرة تسلم الجرة
واشوفكم بكرة

وللا اقول لكم خليها مفاجأة

اشوفكم صدفة