يوميات بريزة فضة ..15

يوميات بريزة فضة 15
*

وررررررررجعتلكم تاني
بريزة مش أي بريزة
بريزة عزيزة لذيذة
ومعاكم حصرياً على جروب النجوم
وحالياً كمان على شلتنا
وحشتوني جداً اصحابي وصاحباتي وحبايبي
وما بعدنيش عنكم غير الشديــــــــــــــــــــــــد
عارفة هتقولولي ايه
زعلانين منك يا بريزة
مخاصمينك يا لذيذة
بس لو عرفتوا اللي جرالي
أكيد هترحموا حالي
أصل الموضوع
قبل ما اقولكم
في حد قاعد جنبكم
بصّوا كويس
في حد مستخبي في درج المكتب
أو في رف الدولاب
إتأكدتم ان مافيش حد
أوك
ركزوا معايا
طقطقوا ودانكم
ومحدش يقوللي ازاي
بس هي بتتقال كدة
انا عن نفسي باطقطق صوابعي
المهم
ارجع بيكم كام يوم للخلف
من يوم ما عرفت الحكاية
واللي لغاية دلوقتي ما بيجينيش نوم بسببها
قال ايه
في كائنات ناوية تحتل الارض
وفي اطار سعيها لاحتلال الارض
قررت حاجة خطيرة جداً
انها تشعل الفتنة بين أهم قوتين على كوكب الارض
مش قصدي امريكا وبقية العالم....لأ
قصدي بين الرجل والمرأة
مش مصدقين
طب ايه رأيكم بقى
انا عندي معلومات اكيدة
إن الرجالة هتختفي بحلول عام 2010
وده بمساعدة الكائنات دي طبعاً
واللي استغلت ابحاث تطويرعملية الاستنساخ
وقومت الفكرة في رؤوس النساء
وأكدت على إن الست مش هتحتاج الراجل
في أي حاجة بعد كدة
حتى ال.........؟
لدرجة إن في قانون أقره مؤتمر السكان العالمي
يتيح اقتران المرأة بالمرأة
وكنوع من أنواع التمويه
أقروا إقتران الرجل بالرجل
وده طبعاً جزء من خطة الاحتلال
منع التناسل الطبيعي
واللي حافظ على وجود البشرية منذ الخلق الاول
وطبعاً القضاء على الرجل
مش هييجي كدة في يوم وليلة
الأول لازم الستات تتولى أعلى المناصب
ويبقى ليها دور في القيادة واتخاذ القرار
عشان لما يبتدي الاحتلال لكوكب الارض
يبقى كل شئ تمام
وتبدأ الكائنات دي في الاستفراد بالنساء
بعد ما يكونوا اقنعوهم بالقضاء على الرجالة
وطبعاً مجرد الصدمة اللي هتصيب النساء
بانهم قضوا على الجنس الاخر تماماً
وانهم نفذوا مخطط مهد لاحتلال الارض
مجرد الصدمة دي كافية للانهيار
وتبقى الارض مرتع للكائنات الغريبة
واللي نفذت خطتها بكل دقة
واسمعوا الحكاية عشان تتأكدوا بنفسكم
انا خير اللهم اجعله خير
كنت ممددة في جيب هاني صاحبي
حوالي الساعة 12 الضهر
والشمس تسيح الحديد
وهاني كان راجع من رحلة في اسكندرية
وفجأة العربية كأكأت
كئ كئ كئ
تششششش
ولقينا نفسينا في وسط الصحرا
ولا حياة لمن تنادي
حتى شبكة الموبايل كانت واقعة
يعني ممكن نسيح من غير حد ما يحس بينا
وأنا غمضت عيني وفتحتها
كانت الدنيا ليل
ولسة واقفين نفس الوقفة
اصل هاني الفالح حب يختصر الطريق
وخد طريق فرعي
و
وفجأة لقينا نور قوي
قلنا عربية جاية بسرعة
لا دي اسرع من العربية
طيارة جاية بسرعة
برده اسرع من الطيارة
صاروخ جاي بسرعة
هاني .. الحق استخب..
وما لحقتش اكمل الكلمة
النور غطانا وحسيت انه بيسحبنا ليه
وانادي على هاني
ولا هو هنا
ولقيت النور بيخفت واحدة واحدة
وابتدت ملامح المكان والاشياء تظهر
ويا ريتها ما ظهرت
على الرغم من ان كل شئ في المكان
مكسو بنفس لوني الفضي الجميل
إنما الكائنات اللي كانت مالية المكان
ابشع بكتير من أي كائنات شفتها
حتى في افلام الخيال العلمي
ايه ده
انا بأقول كائنات
بسهولة كدة
مصيبة لتكون كائنات فضائية
وجاية تحتل الارض
وقبل ما عقلي يجاوب على سؤالي الساذج
لقيتهم بيمدوا أيديهم
هية مش ايدين بمعنى ايدين
بس هية زوايد طالعة من جنبهم
المهم
مدوا ايديهم وطلعوني انا وكل اللي في جيب هاني
ولقيتهم بيخلعوا هاني من هدومه
لغاية ما بقى........؟
هاسيبكم تتخيلوا
وقعدوا يفحصوه باجهزة غريبة
وهاني حبيب قلبي مش داريان بحاجة
وفهمت من كلامهم اللي مش عارفة فهمته ازاي
انهم أخدوا كائنات بشرية
وعملوا عليها التحاليل والاختبارات
عشان يشوفوا نقطة ضعفهم
واكتشفوا إن نقطة ضعف الرجل
هي المرأة
وان الرجل ممكن يضحي بنفسه
لأجل أنثاه
أما المرأة فعلى الرغم من حصولها على كل شئ
بما في هذه الأشياء الرجل نفسه
إنما كانت حاسة إن في شئ ينقصها
ودي كانت البداية
إبتدت الكائنات الفضائية تخطف سيدات مجتمع
وأخريات لهم شأن في البلاد
ويزرعوا مكانهم كائنات
خدت نفس شكلهم لكن عقلهم
فيه الأفكار الفضائية المشوهة
واللي مفادها
ان لانتوا لا الرجالة
على ظهر هذا الكوكب
ولأن الكائنات دي خدت صور سيدات مجتمع
فبدأت النساء تصدق كلامهم الجديد
وبدأوا يحسوا بالغيرة من الرجل
بعد إن كان إحساس الغيرة على الرجل
وحبة.... حبة
إبتدت تطلع مؤسسات لمحاربة الجنس الذكري
وأوشكوا أن يبلغوا منالهم
بس الشئ اللي حيرهم
إن الرجل على الرغم من كل اللي بيحصل
لسة شايف المرأة في صورتها الملائكية
وان الحب اللي في قلب الرجل
صعب جداً ينتزعوه بأجهزتهم
المهم كفاياني فلسفة
وارجع لكم تاني للحكاية
عرفت من الكائنات دي
إنهم نتيجة لعدم استطاعتهم زرع كراهية النساء
في قلوب الرجال
هيبتدوا يخطفوا الرجالة
ويزرعوا مكانهم كائنات منهم
فنصيحة لكل بنت وامرأة
خدي بالك من الرجل اللي جنبك
قبل ما يتخطف منك
آه بالنسبة ليه أنا وهاني
أنا فقت على صوت عربية نقل
وقفت لنا ف قلب الصحرا
والظاهر كدة إن أنا كنت مغمى عليه من السخونة
بس اللي أنا مش قادرة أحدده
اللي أنا حكيته ده كان تخاريف وللا حقيقي
اللي يعرف يجاوبني
وعموماً
احتياطي
خدوا بالكم من بعض
انتم مالكمش إلا بعض
وأنا ليه ريال وضايع مني
محدش شاف ريال فضة
وأخيراً
الى كل النساء والبنات والجنس اللي زي الشربات
عشان خاطري بصوّا للرجل بصّة جديدة
وتخيلوا الدنيا من غير رجالة هتبقى عاملة إزاي
يع يع يع
هتبقى فظيعة
وأشوفكم بكرة
وللا أقول لكم
أشوفكم صدفة
واستودعكم الله
بريزتكم .... بريزة فضة