يوميات بريزة فضة..2

يوميات بريزة فضة 2

ملخص ما نشر

اول ايام لبريزة فضة في هذه الحياة كانت داخل جيب موظف بسيط انتقلت بعده الى يد ابنته الصغيرة كعيدية وسرعان ما انتقلت من يدها الصغيرة ليد البقال والذي وضعها بدوره في الدرج

......
حبايبي اصحابي وصاحباتي

بريزتكم الفضة رجعتلكم تاني

والنهاردة وزي ما وعدتكم هاحكيلكم عن

*

ايام في الحلال جوه درج البقال

*

اول ما نزلت جوه الدرج كانت الدنيا ضلمة والدرج كان واسع وكبير بس كان مليان فلوس ورق كتيييييييييير وانا آجي ايه في الاحجام الكبيرة دي ده انا يدوب ....... بريزة فضة

واول ما سكان الدرج خدوا بالهم مني ابتدت بقى الحركات القرعه اياها كل ربع جنيه ورق شايف نفسه يبتدي يتقرب مني ويستعرض عضلاته والصور اللي مرسومة عليه اكمني انا كنت لسه جديدة وبالمع كان كلهم عينهم مني ووصلت ان جنيه بحاله حاول يغازلني لكن على مين شرف البريزة زي الترماي اتجاه واحد يروح ما يرجعش "مثل برايزي قديم" المهم وانا جوه درج البقال كنت باشوف ايده بتتمد تاخد فلوس وتحط فلوس وفي كل مرة كنت اتمنى ياخدني ويخيب ظني لما ياخد بريزة ورق مقطعة اكتشفت بعدها انه كان محتفظ بيه عشان انا جديدة وبالمع وما كانش عايز يصرفني لغاية ما جيه اليوم اللي دق قلبي فيه اول دقة ما تستغربوش000000 حتى البريزة الفضة ليها قلب ممكن يحب ويتحب كنت اول مرة اشوف ريال فضة بالجمال ده وبالرغم من كل الريالات قد بعض أنا كنت شايفاه أطول وأعرض وكان تقيل تقل ياااااااااااااه ولا مرة حاول يقرب مني بس كنت بالمح نظراته من تحت لتحت وفي يوم ما طلعتلوش لمض البقال اتزنق في فكة ومد ايده000000 وخدني واداني لست كبيرة في السن وكانت آخر مرة اشوف فيها حبيبي الريال ويا ريتها جت على قد كده الست طلعت بخيلة جلدة وحطتني في كيس قماش وقفلت عليه وكانت 000000 طولت عليكم النهاردة000000 معلش0000 سامحوني بكرة هاكمل لكم

معاناة بريزة أصيلة في كيس الست البخيلة

ما ينفعش اسم فيلم ده

مش مهم

المهم استنوني بكرة

*

بااااااااااااااااااااااااي