يوميات بريزة فضة..7

يوميات بريزة فضة..7
*

وررررررررر...............جعتلكم تاني

بريزة .....عزيزة...... لذيذة ومعاكم حصرياً

يومياتي يوميات بريزة فضة

كنتم سيداتي انساتي ساداتي مع الموجز واليكم الاخبار بالحرف
حبايبي اصحابي وصاحباتي
النهاردة جايالكم وبعد خروجي من اوضة العمليات بالسلامة جاية عشان احكيلكم

اغمر مغارباتي قصدي اغرب مغامراتي و000000 نبتدي الحكاية

*
بعد ما وقعت من عربية عم حسين الله يمسيه بالخير لقطتني ايد ناعمة وملظلظة عرفت بعدها ان دي ايد منى الممرضة خدتني منى ونفضتني من التراب وتحط ايديها يمين شمال المسكينة كانت لابسة من غير جيوب طب وبعدين بصيتلي بصة حسيت بعدها انها هترميني تاني وفجأة افتكرت حاجة واتصرفت وحطتني تقولوا فييييييين؟ انا عن نفسي مش هاقدر اقول والا الرقابة هتمنع ظهور اليوميات المهم تعرفوا اني كنت قريبة من قلبها بصراحة المكان اللي انا استقريت فيه اتاحلي الفرصة اني ادخل اوضة العمليات مع منى

وياريتني ما دخلت
اول ما دخلت اوضة العمليات
يع..يع.. يع الريحة فظيعة
يعني لو واحد سليم لازم يمرض ويحتاج عملية
اما اللي حصل جوة فده موضوع تاني خالص دخل المريض اللي هيعمل العملية (المفروض انها الزايدة) المريض صاحي وزي العفريت واول ما دخل وشاف الممرضات كان هاين عليه يقوم يقف على حيله
دخل دكتور التخدير وقعد يتكلم كلام كتير آخر الكلام حط له حاجة كدة فوق وشه وقال له خد نفس ويبدو ان صاحبنا كان متعود خد نفس..... والتاني ...... والتالت ويشد ولا كإن في حاجة الدكتور اكتشف بعد ربع ساعة
!!انه بيشد من انبوبة اكسجين
وعنها وقعد يزعق للمريض وطبعاً المريض مش فاهم حاجة
وعلى الجانب الآخر (حتة ثقافة بقى)
كانت الممرضات المبجلات يبردن اظافرهن التي تحتوي على جميع انواع الميكروبات المعروفة واللا معروفة وكن يضعن المانيكير والحادي كير والبادي كير في انتظار انسطال المريض ودخول الدكتور الجراح الكبير
ونرجع تاني للبساطة ونتكلم بالبلدي
دخل الدكتور من هنا وكل شئ منضبط والممرضات في مكانهم والادوات نضيييييييييييييفاااااااااا ومعقمة بالجاز قصدي بالغاز
وحصلت حاجات بعد كده
بصراحة انا مش فاهماها لحد دلوقتي الدكتور فتح الجنب الشمال للمريض
!!مع ان الزايدة في الجنب اليمين
وتقريباً لما افتكر كان بالفعل شايف الكلية الشمال قدامه
ما طولش عليكم خاصة الناس اللي بيغمى عليها من ريحة الدم
هوه طلع كام حاجة كدة وحطهم في صينية مش عارفة ليه اداني احساس ان مالهومش لازمة عند المريض
واخيراً وصل للزايدة
وفهمت من الكلام اللي قاله ان الزايدة زي الفل وان الموضوع اساساً كان مغص كلوي وشوية شتيمة ما اللي يقلبك يحبها عالحمار اللي شخص الموضوع على انه زايده
لغاية كده والموضوع كان معقول
بس لما لقيته ساب المريض مفتوح بالعرض وقال لمنى خيطي
بجد بدأت اقلق
ومنى طبعاً ما صدقت اعتبرت ضهر الراجل جنب البلوزة بتاعتها وغمضت عنيها بخبرة المحترفين وهاتك يا خياطة ومنى في الوضع ده كانت مايلة عالمريض شوية .... يمكن شويتين
وفي لحظة رسمها القدر
ولا من شاف ولا من دري
اتزحلق من الحتة اللي انا كنت فيها جنب قلب منى وهوب...... جوه الخندق اللي مفتوح في ضهر الراجل
!!!!!...ودننننننننننننن
ومنى ولا هية هنا نازلة خياطة كإنها بعد ما تخيط الحتة اللي في ايدها دي هتبيعها
والدنيا بدأت تضلم والدم حوالية في كل مكان
وافتكرت اغنية عبده الحليم ان كنت قويا انقذني من هذا الدم
وما حسيتش بحاجة تاني
ملحوظة : حد يبلغ الاسعاف

واشوفكم بكرة