يوميات بريزة فضة ..14

يوميات بريزة فضة 14
*

ورررررررجعتلكم تاني
بريزة مش زي أي بريزة
بريزة ...... عزيزة ..... لذيذة
ومعاكم حصرياً
مش عارفة أودي وشي منكم فين
بعد ما وصلتني رسايل كتير
من حبايبي اصحابي وصاحباتي
وانا عارفة اني مقصرة ومش بكتب لكم
بس اذا عرف السبب ايه؟؟
برافو عليكم راح الجَرَب
قصدي بطل العجب
وما طولش عليكم
انا كنت في رحلة طويلة

*
رحلة تحت الماء
*

آه وحياتكم تحت الماء
اصل الحكاية . . . . خير اللهم اجعله خير وصلت لجيب ولد اسمه رامي ورامي ده كان ولد لذيذ مؤدب وهادي وكان زيه زي أي حد ذوقه عالي ميت في دباديبي
وبيحبني خالص وكان بيحتفظ بيه في درجه الخاص
وف يوم من ذات الايام دخل رامي الاوضة وهو بيتسحب وماشي على طراطيف صوابعينه
انا قلقت....وقلت اكيد الموضوع في سر ولقيته بيقرب م الدرج وبيفتحه
وبياخدني انا وشوية حاجات تانية قريبة لقلبه ومقتنيات بيحبها وبيخرج من سكات
مش عارفة ليه حسيت بالقلق خاصة ان رامي مش على طبيعته وبيتصرف تصرفات غريبة
وما فيش اغرب من كده هيعمل ايه ده
ده رماني في حوض اسماك الزينة
بولولؤ بولولؤ بولولؤ
وما خبيش عليكم
بولولؤ
انا ما ليش في العوم
بولولؤ
ولقيت نفسي باغطس وبابئلل
بولولؤ
لحد ما وصلت القاع بولولؤ
ولحسن حظي ان وقعتي جت جنب مصدر التهوية
بولولؤ
اللي بيوفر الاكسجين للاسماك والا كنت هاموت مخنوقة!!
بولولؤ بولولؤ بولولؤ
وفي عز حيرتي من تصرف رامي وانا مش قادرة افسر اللي حصل ده بإيه
بولولؤ
بصيت حواليه
بولولؤ
ولقيتني وسط عالم جديد وغريب اسماك كبيرة ... واسماك صغيرة واشكال مختلفة بس كل شكل له جماله
بولولؤ بولولؤ
كله كوم وست الدار دي كوم وست الدار دي سمكة
بولولؤ
انا اللي سميتها كده اصلها طول النهار بتنضف في الحوض وبتلمع في الإزاز(الزجاج يعني)
بولولؤ بولولؤ
وانواع كتيرة اللي دهبي واللي برتقالي واللي فضى
واللي ....
بولولؤ
وطبعاً الفضي كانت المفضلة عندي بولولؤ
عشان لونها من لون قلبي الفضي الجميل
ما اطولش عليكم
بولولؤ
وانا راقدة في قاع المحيط
بولولؤ
قصدي محيط الحوض يعني لاحظت حاجة غريبة
بولولؤ
ان في سمك كبير مالوش لا شغلة ولا مشغلة
بولولؤ
ولا بيدور على اكل حتى وبيستنى السمك الصغير يجيبله الاكل لحد عنده
بولولؤ بولولؤ
وان ماجابلوش الاكل بياكله هو نفسه
بولولؤ بولولؤ
واتضح ان الموضوع في اتاوات وعصابات
بولولؤ
وحركات من بتاعة البني آدمين وقعدت افكر
بولولؤ
يا ترى السمك اتعلم كده م الانسان
بولولؤ
وللا الموضوع تبع نظرية التطور اللي انا مش فاهماها لحد دلوقتي
بولولؤ
وان الانسان كان اصله سمكة بلطي
بولولؤ
وعشان كده بدأ يطبق نظرية أسلافه السمك الكبير ياكل السمك الصغير
بولولؤ بولولؤ بولولؤ
المهم حاولت كتير ابعت رسايل استغاثة وكنت باشوف مراكب معدية من فوقي
بولولؤ
اتضح بعد كدة انها مراكب ورق بتاعة رامي!!
بولولؤ
ولما وقع زلزال تسونامي
بولولؤ بولولؤ
تفتكروا حصل ايه؟؟
بولولؤ
اسماك كتير حمدت ربنا انها موجودة في حوض سمك
بولولؤ
على بعد آلاف الاميال من اللي حصل في بيت آمن ومكان جميل
بولولؤ
ولو كانت في البحر ساعة اللي حصل كانت غرقت!!
بولولؤ بولولؤ
قصدي كانت بيوتها اتهدمت وسكنت في قواقع الايواء!!
بولولؤ
ولمست تغيير كبيييييييييييييير في سلوك الاسماك بعد الموضوع ده
بولولؤ
مابقاش في حد بيبلطج
بولولؤ
كل الافراد بتشتغل... وبتسعى وبقى فيه تراحم وتعاطف
بولولؤ بولولؤ
وما عادش السمك الكبير ياكل السمك الصغير
بولولؤ بولولؤ
الأكادة ان السمك اتغير والبشر زي ما هما
بولولؤ
كله بياكل بعضه
بولولؤ
واللي يقدر يضر اخوه بيضره
بولولؤ
وهو ده بالظبط سبب رميتي في الحوض
بولولؤ بولولؤ بولولؤ
اتضح ان رامي له أخ توأم بس كان على عكس رامي خالص شقي ومؤذي و...
بولولؤ
وكان مسافر عند خالته لما انا جيت البيت
بولولؤ
عشان كده انا مفرقتش بينه وبين رامي لما دخل الاوضة يتسحب وخدني وحصل اللي حصل
بولولؤ بولولؤ
بس الحمد لله رامي صاحبي لقاني وهو بينضف الحوض
بولولؤ
وخرجني وغسلني ورجعني معززة مكرمة
بولولؤ بولولؤ
للدرج الخاص بيه وكمان أخوه خد جزاءه
بولولؤ
لما كان بينط من على سور المدرسة ورجله اتكسرت
بولولؤ بولولؤ
وقعد في البيت
بولولؤ
مش عارف يتحرك ولا يأذي حد
بولولؤ بولولؤ
اصحابي
انا سعيدة جداً برجوعي ليكم
بولولؤ
وسعيدة برسايلكم الجميلة اللي بتحسسني قد ايه انا غاليه عندكم
بولولؤ بولولؤ
اصحابي
اتعلموا من السمك
بولولؤ
مش تتعلموا تاكلوا بعض...لأ
بولولؤ
اتعلموا انكم تتعظوا م اللي بيحصل حواليكم وتحمدوا ربنا عالنعمة اللي انتم فيها
بولولؤ
واياكم حد ينط سور المدرسة
بولولؤ
وإلاهيحصله زي اللي حصل لأخو رامي
وأشوفكم بولولؤ... قصدي بكرة
بولولؤ