يوميات بريزة فضة ..18

يوميات بريزة فضة 18
*

وررررررررجعتلكم تاني
بريزة مش أي بريزة
بريزة عزيزة لذيذة
ومعاكم حصرياً
اصحابي.. صاحباتي.. حبايبي
وحشتوني .....وحشتوني ....وحشتوني
ما تتصوروش ازاي
دايماً الواحد بيحتاج أصحابه في الأزمات
وبيحس انه مفتقدهم
ونفسه في حضن صديق يرمي نفسه فيه
ويعيط زى العيال
وانا في الحاجات دي ماقولكمش
" تسيل دموعي انهاراً "
وانا كنت في أزمة
أزمة كبييييييييييييييرة
بس الحمد لله عدت على خير
اصل الموضوع وما فيه
زي ما انتم عارفين إني مشهورة
وكل الناس بتحبني والحمد لله
وزى ما تقولوا كدة في مجانين للشهرة
يحبوا يلزقوا للمشاهير ويقولوا عليهم كلام
أو حتى يشنعوا عليهم بكلام ما حصلش
أو يصوروهم ويلعبوا في الصور
حاجات كتير ما كنتش واخدة بالي منها
قبل ما يحصل لي اللي حصل
واللي حصل أن واحدة من مجانين الشهرة
صورتني
او بمعنى اصح
Copyخدتني
لغاية كدة عادي في ناس تحب
تحتفظ بنسخ من الاعمال المشهورة
زيي يوميات بريزتكم حبيبتكم
لكن اللي حصل إنها ما اكتفتش بكدة
Past هي عملت
وبدأت تلعب في اليوميات
وتزود كلام... وتغير في الحوار بتاعي
كل ده من ورايا أنا وهاني
وعلى الرغم إني ما كنتش اعرف
إلا إن قلبي الفضي الجميل
كان حاسس إن في حاجة غلط
المهم المعجبة المجنونة دي
ما اكتفتش بانها تغير محتوى حياتي
لأ وراحت هيلا بيلا
حاطاني على منتدى تاني
بس منتدى بعيييييييييييييد
عشان محدش من أصحابي وحبايبي
يشوف صورتي المشوهة دي
ويبلغ عنها
وطبعاً زي ما انتم حبتوني
الناس اللي قروا يومياتي عالمنتدى التاني ده
هما كمان حبوني
على الرغم من اللعب اللي اتلعب
وبدأوا يبعتوا لمجنونة الشهرة دي
ويقولولها بريزة دي حلوة قوي
بريزة دي فظيعة
وحاجات من دي
إبعتي لنا بقية اليوميات
اليوميات قصيرة طوليها شوية
وصاحبتنا خدتها الاضواء
وبقت ترد عليهم
ميرسي خالص أنا ماعملتش حاجة
دي حاجة بسيطة خالص
"طبعاً كوبي وباست سهلة خالص"
وساعات تقول لهم معلش
انا ماكنتش فاضية اليومين اللي فاتوا
انا باحكيلكم الكلام ده ببساطة
بس ماتتصوروش حالتي ساعة ماعرفته
كنت هانفجر من الغيظ
واتحول لملاليم صغيرة
المهم أن واحد من اصحابي الانتيم
شافني على المنتدى التاني ده بالصدفة
وماصدقش عينيه لما شاف يومياتي
اللي هو حافظها زي اسمه
متغيرة وملعوب فيها كمان
على طول كلم هاني حبيبي
وقال له عاللي شافه
وهاني الهادي الطيب
إتحول الى وحش
ثورة غضبه كانت طوفان
شال كل اللي وقف قدامه
كلم المشرفين بتوع المنتدى
وحط توبيك عشان الناس كلها تعرف
مين هي بريزة
وشكلها ايه وحواراتها عاملة ازاي
والحمد لله المشرفين استجابوا وشالوا
النسخة الممسوخة دي
ورجعتلكم يا اصحابي ويا حبايبي
سليمة وبكل خير
اللي محيرني دلوقتي يا اصحابي
هل في حد تاني من مجانين الشهرة
خد مني نسخة من عالمنتدى التاني ده
وغير في يومياتي بدماغه
ونشرها في حتة مانعرفهاش
وهل الناس دي تقصد الضرر
وللا هيا شايفاها حاجة سهلة ومابتضرش حد
أكيد طبعاً بتضر
ولقيتني باسرح في فضايح الفنانين والفنانات
والصور اللي بتنشرها المواقع اللي مش هية
والأخبار اللي بتنشرها الصحف الصفرا
وتعاطفت معاهم قوي
حسيت إنهم ضحية زيي
وان في حد خد أخبارهم وصورهم
ولعب فيها بمزاجه
اصحابي
هاني بعد ما رجعني
قعد يكلمني على حاجة اسمها
حقوق الملكية التفكيرية
وان دي بتحفظ حق الواحد في
الاحتفاظ بأفكاره باسمه
وتمنع أي حد من سرقتها
اصحابي
دي دعوة مني
دعوة من بريزة فضة حبيبتكم
عشان محدش يحس بالاحساس الوحش
اللي انا حسيته ده
وعشان اللي عنده موهبة
ينشرها من غير خوف
ارجوكم يا اصحابي
لو هتنقلوا عمل عاجبكم من أي موقع تاني
انقلوه
بس بدل ما تقولوا الكلمة المبتورة
اللي اسمها منقول
كملوا وقولوا منقول عن مين
ويستحسن تكلموه عالميل وتستأذنوا منه
ولو ما كانش كاتب اسمه
قولوا منقول من موقع كذا
وادوا كل واحد حقه
اصحابي ماتتصوروش إحساسي بالظلم
والدعا اللي دعيته عاللي عمل كدة فيا
مش عايزة حد يدعي عليكم
بالعكس عايزاه يدعيلكم
وعشان آخد انا المبادرة
واكون قدوتكم
انا باعلن وبكل شجاعة
أن الكلام اللي فات ده كله
منقووووووول
من بريزة فضة