يوميات بريزة فضة..5

يوميات بريزة فضة..5
*

ملخص ما نشر
بريزة جت للدنيا و...........................................وعنها ووصلت لايد حمادة
حبايبي أصحابي وصاحباتي
انا مبسوطة جداً لإهتمامكم بيه والسؤال عن اخباري واللي شايف يومياتي حلوة ...... انا سعيدة لسعادته واللي شايفها مش قد كدة..........................ممم أنا برضة بريزة فضة مايبقاش ياخد على كلامي

وحمادة دة بقى شخصية سحرية اللي يشوفه يحس انه من عالم سمسم الخالق الناطق .... فلفل ولو اني ما اعرفش يعني ايه الخالق الناطق بس هما بيقولوها كدة ما علينا حمادة.... فلفل (هو بعينه) خدني من الفرن وأصر انه يحطني في الحصالة وانا ناقصة حاولت افلفص من ايده انط من جيبه حاولت اهرب م الحبس الجماعي اللي ناوي يحطني فيه وباءت محاولاتي بالفشل ما تستغربوش الجملة دي انا سمعتها في فيلم تاريخي وانا داخلة الحصالة افتكرت كلمة عبد الوارث عسر ياما في الحبس مظاليم
اصحابي....ارجوكم لو حد معاه بريزة زيي ارجوكم ما تحطوهاش في حصالة هيه مالهاش ذنب ...هيه طلعت لقت نفسها بريزة
ومن حظي الحلو الحصالة كان فيها كام ريال دمهم يلطش قدام كدة ومخربشين وما صدقوا لقوني بريزة.....جديدة .....وحلوة.........و.........و وهاتك حركات قرعة وطبعاً الحصالة مساعدة ضيقة وضلمة و.......و بس على مين
أنا فضة والأجر على الله
هية دي الكلمة اللي اقتبستها مني المرحومة سناء جميل في مسلسل الراية البيضا
وفلفل.. قصدي حمادة كان عنده عادة غريبة قوي كان كل يوم يفضينا من الحصالة ويقعد يعدنا
وفى يوم مزحلق وحمادة قاعد بيعدنا نطت القطة نوجا عليه على غفلة اتخض واتبعزقنا من ايده في كل حتة و وجت وقعتي تحت السرير ولكم ان تتخيلوا اني قعدت تحت السرير اطول ساعتين في عمري وفلفل .... قصدي حمادة بيدور في كل حتة الا تحت السرير
تخيلت ساعتها يبقى ايه الوضع لو معرفش مكاني لو سابني وما دورش عليه لو لو
أصحابي ارجوكم لو حد صاحبه وقع منه يا ريت يدورعليه تحت السرير!! قصدي يعني يدور عليه في كل حتة لغاية ما يلاقيه وما يفرطش فيه تاني أبداً
وكفاية كده عشان انا قربت اعيط
فلفل لقاني بالصدفة لما زهق من البحث ونزل تحت السرير عشان يجيب الشوز بتاعه ولما لقاني حسيت لاول مرة انه مايستاهلنيش
انا كنت فاكراه هيتنطط م الفرحة لما يشوفني كل الي عمله انه قال ببساطة انا كنت عارف اني هالاقيكي هنا يا سلام ياخويا وبرضة خدني وحطني فى زنقة الريالات
بعد كام يوم حمادة فلفل كمل التحويشة خمسة جنيه وخدنا بربطة المعلم وراح مدينا

لعم حسين السواق

وخد منه خمسة جنية صاحية قصدي يعني مجمدة مش متلجة مجمدة مش مجمدة م م م مش مهم
المهم اني مع عم حسين

حسيت اني فعلاً ابتديت اعرف الدنيا و
واشوفكم بكرة