يوميات بريزة فضة ..16

يوميات بريزة فضة 16
*

وررررررررجعتلكم تاني
بريزة مش أي بريزة
بريزة عزيزة لذيذة
ومعاكم حصرياً
وحشتوني وحشتوني وحشتوني
وراجعالكم بعد رحلة كفاح
اصل الموضوع وما فيه
اني قررت ارشح نفسي للرئاسة !!؟
وقبل ما أي ندل فيكم يرفع سماعة التليفون
ويبلغ الامن العام
انا قررت ارشح نفسي لرئاسة العملات النقدية
مش مصدقين طبعا ً
طب فكروا معايا كدة
في عملة نقدية احلى مني
ولا اطعم مني
وللا عندها مذكرات زي مذكراتي
ما فيش
ثانيا ً الجنيه اللي هو العملة المحلية في مصر
شوفوا بقاله كم سنة على كرسي الرئاسة
لا هو عايز يرفع من سعره في السوق
ويرفعنا معاه طبعا ً
وللا هو عايز يتحتح من مكانه
ويدي فرصة لغيره
وبناء ً على ما تقدم
نوصي باعدام المتهم حرقا ً بالبنزين 92 الجديد
ايه اللي انا باقوله ده
قصدي بناءً على ما تقدم
قررت ارشح نفسي لرئاسة العملة المحلية
وبعديها اخش عالعالمية بقى
وفي سبيل ذلك
رحت اتقدمت لرئاسة مجلس العملات
واديتهم اوراقي ونسخة من مذكراتي
ونبذة عن تاريخي في الكفاح
وقال المسئول
ما ينفعش يا هانم تيجي كدة منك لنفسك
لازم تكوني طالعة من خلال ترشيح
عدد من الحصالات لا يقل عن مليون حصالة
مليون حصالة؟؟؟ ده لو في مليون حصالة في البلد
كان زمان مستوانا الاقتصادي ارتفع!!
خدته على قد عقله وقلتله بتريقة
في طلبات تاني؟؟
قاللي طبعا ً
انت لسة شفتي حاجة
لازم على الاقل خمس بنوك محلية ترشحك للرئاسة
بنوك ايه يا عم انا مالي ومال البنوك
انا عايزة اترشح عشان الشلن والبريزة والربع الجنيه
عشان العملات اللي مش لاقيه مأوى
ولا ليها سعر في السوق ولا فايدة
رد البيه المسئول وابتسامة النصر فوق شفايفه
هو النظام كده
اللي بعده
ومشيت وانا عماله افكر في الموضوع ده
ازاي هاجيب موافقة مليون حصالة
مليـــــــــــــــــون
طب قول 110 تبقى معقولة
وايه حكاية البنوك دي كمان
اساسا ً البنوك بطلت تتعامل مع
العملات الصغيرة اللي زيينا
ده حتى سواقين الميكروباص
وبياعين المناديل الورق
بقوا يدوا الباقي لبان
مش هاطول عليكم في عز ما انا سارحة
ما خدتش بالي ان في حد ماشي ورايا
واول ما حسيت ان في حد ورايا
لفيت وقلت مين هناك
رد وقال دونت بي فريد (ما تخافيش بالانجليزي)
قلتله هو ار يو
قاللي ايام ذا سنت
قلتله القديس يعني وللا ايه
قاللي لأ انا سنت ابن دولار
قلتله ما انت بتعرف تتكلم عربي اهو يا..... ؟
وعرفت منه
انه مبعوت من قبل الملحق التجاري
الدولاري في مصر
وان الدولار معجب جدا ً بيا
وعايز يساندني في حملتي الانتخابية
ممممممممممممممم
الموضوع بدأ يكبر
انا كنت فاكرة اني هاروح اتقدم
ياخدوا ورقي
ويوم الانتخابات تيجي العملات
اللي هترشحني ترشحني وخلاص
وطبعا ً انا غنية عن التعريف
اتضح ان الموضوع اكبر من كدة بكتير
وان الحكاية لازم لها تخطيط
وضرب تحت الحزام
يعني بصراحة كدة
لازم اشنع في المرشح اللي قدامي
واطلع فيه القطط الفطسانة
واقول انه حرامي وهبيش
وما يصحش وما يجيش
اننا ننتخبه تاني
وحاجات زي كدة
وقاللي سعادة ال سنت
ان جناب الدولار ناوي يدفعلي مبلغ وقدره
مش عايزة اقول لكم الرقم عشان ما يغمانش عليكم
وكمان هيضمن لي تأييد كبير من
البنوك الدولية مش بس المحلية
لما امسك رئاسة العملة المحلية
بيني وبينكم انا فكرت
وفكرت تاني
غير التفكير الاولاني
واللمبة نورت
واديتهم وعد باني معاهم
وبدأ الشغل
صوروني صور بروفيل
انما ايه ديجيتال
وخلفيات بقى وشغل فوشو توب
وللا اسمها ايه دي
ونزلوا صوري في الجرايد والمجلات
ومانشيتات بقى
البريزة مستقبل العملات الجديد
انتخب بريزة تحصل على رضا الدولار
البريزة دي لذيذة والجنيه راحت عليه
وقامت الدنيا وما قعدتش
ازاي بريزة تتطاول وترشح نفسها قدام الجنيه
واللي طالبوا بالتحفظ عليه
واللي طالبوا باعدامي تسييحا ً عالنار
واللي حاولوا فعلا ً يتخلصوا مني
كل ده وانا بادعي ربنا اني اوصل
ليوم الانتخابات
واضرب ضربتي بقى
وعلى ما جيه يوم الانتخابات
كان الدولار صرف مبلغ وقدره
واداني شخصيا ً مبلغ كبير اصرف منه
وده انا احتفظت بيه لوقت عوزة
وجيه يوم الانتخابات
وكان في مقابلة اعلامية للمرشحين
ولما جيه دوري
اتنحنحت كدة وقلت
ايها البرايز والشلنات في كل انحاء البلاد
في المحافظ والحصالات
اسمعوني فقد تكون هذه اخر كلماتي
وبصيت حواليا يمين وشمال
قلت بدل ما حد يتهف في دماغه وينشني بجد
والجماهير هاجت وماجت
وقعدت تهتف لي
قلتلهم ارجوكم اسمعوني
وقلت
احنا بنمر بمرحلة صعبة جدا ً
من تاريخنا الاقتصادي
مرحلة سعرنا فيها قلّ
وعزيزنا فيها اتذل
وبالعربي كدة مش عايزين نعض في بعض
الاعلانات اللي انتم شفتوها
والصور اللي اتنشرت ليا دي
دافعة تمنها مؤسسات خارجية
هدفها عمل بلبلة
وانها تفرق رأينا
وتخللينا نعض في بعضنا
وانا زي ما عرفتوني
مش ممكن اسمح بحاجة زي كدة
وانا من مكاني ده
باعلن اني واقفة مع الجنيه
قلباً وقالباً
نعوم نعوم سوا
نغرق نغرق سوا
ولا ييجي اليوم اللي حد يوزِّنا على بعض
نعوم نعوم سوا
نغرق نغرق سوا
وبدأت الجماهير تهتف معايا
نعوم نعوم سوا
نغرق نغرق سوا
يا جنيه يا جنيه احنا معاك يا بن الايه
ورحت فاتحة الشنطة اللي ادهاني ال سنت
ورميتها للجماهير
نعوم نعوم سوا
نغرق نغرق سوا
ولا حد رد عليا
كانوا بيلموا في الدولارات
المهم
الجنيه كسب الانتخابات باكتساح
وحاول يديني منصب في الحكومة
بصراحة انا مارضيتش
حسيت ان مكاني هنا
وسطكم
وسط الشعب
بس على الله الدولار ما يعرفش يوصللي
أحسن ده مستحلف لي
وراصد مبلغ وقدره للي يدل عليا
بس انا عارفة انكم ما تعملوهاش
وللا ايه
واشوفكم صدفة