يوميات بريزة فضة..9

يوميات بريزة فضة9

ورررررررررر..................جعتلكم تاني

بريزة .......عزيزة ............ لذيذة ومعاكم حصرياً
يومياتي
يوميات بريزة فضة
حبايبي اصحابي وصاحباتي

قبل أي حاجة أحب أشكر كل واحد كسل يدور عليه ويشوفني في أي صندوق صدقة قدام انهي جامع وسيبتوني وحيدة وكأني ماليش أصحاب يهتموا بيا
بس عموماً بعد اللي حصل لي في اليومية اللي فاتت

(راجع يومية 8)

كان لازم اريّح يومين
وعشان كدة خدت يومين استجمام في الصندوق محاطة بكل انواع النقود الورق والفضة..الكبير والصغنن
واستنيت اليوم اللي هيفتحوا الصندوق فيه واتمنيت اروح لايد حد يستاهلني حد فعلاً محتاجني
وفي يوم الجمعة الصبح .... فتحوا الصندوق
وقعدوا يعدوّني أنا واخواتي البرايز والشلنات والارباع و..... وكان شئ محزن اننا نلاقي المبلغ اللي اتكون بعد اسبوع صغير جداً لدرجة انهم رجعوني انا واخواتي البرايز للصندوق تاني في انتظار ان يمتلئ الصندوق بعد صلاة الجمعة
ولما حانت صلاة الجمعة وقف الامام يخطب وكان بيتكلم على كفالة اليتيم وذكر الحديث الشريف" أنا وكافل اليتيم كهاتين في الجنة" وذكر كمان فضل رعاية اليتيم والانفاق عليه وقد ايه له ثواب كبير عند ربنا
ساعتها بس انا اتمنيت لو ماكنتش بريزة فضة آه لو كنت جنيه...أو عشرة....أو ميّة لو كنت أي عملة كبيرة اقدر اسعد اطفال ايتام كتير وحسدت البشر اللي معاهم فلوس كتير يقدروا يصرفوا جزء منها عالايتام والفقرا والمحتاجين
وما اطولش عليكم
انتهت الخطبة واقيمت الصلاة وبعد الصلاة كنت مستنية على نار اشوف بقى الصدقات وهي تنهال على صندوق الصدقات ومدى استجابة الناس للنداء الخفى في حديث الامام الخطيب للتبرع للايتام وثواب ده عند ربنا
اول تبرع كان جنيه فرحت التاني كان خمسين قرش وماله بعد كده حاجات بسيطة ربع جنيه وكام بريزة
ما تتصوروش يا اصحابي انا زعلت قد ايه وانا باشوف تصرف الناس في موقف زي ده
وسمعت واحد بيتكلم عن حاجة اسمها نظرية المؤامرة واللي فهمته من كلامه ان الناس خايفة من ان الصدقة ما توصلش للي محتاجها
يا سلام.....بقى عشان وهم عبيط زي ده تحرم نفسك من الثواب وتحرم الايتام من ابتسامة جميلة تترسم على شفايفهم
والناس كل واحد راح في طريقه وانا قاعدة مستنية مصيري ومتمنيه فعلاً لو كنت اقدر اكون سبب في اسعاد يتيم او محتاج
والظاهر عشان انا قلبي فضي طيب وجميل ربنا استجاب لدعايا واللي اتلم كله في اليوم ده راح لدار ايتام

وسلمونا لماما وفاء وماما وفاء دي هيه مديرة الدار بصراحة كانت اسم على مسمى وبرغم من انها ما انجبتش اطفال بنفسها كانت بتعتبر كل اولاد الدار اولادها
اد ايه كانت عطوفة وحنينة عالكل ومابتفرقش بين واحد من اولادها والتاني تصوروا انا حسيت بحنيتها وهية بتعدني وانا وبقية الفلوس لمسة ايديها بتشع حنية وحنان
ومن فرط حنيتها ما كانتش بتوزع الفلوس عالاطفال وخلاص بطريقة تحسسهم انهم محتاجين وناقصين حاجة ماما وفاء كانت بتعمل لهم مسابقات وفوازير واللي يفوز في المسابقة او يحل الفزورة كانت بتكافئه بقطعة نقدية مننا
صحيح هية كانت مسابقات بسيطة وفوازير سهلة بس كانت بتحسس اليتيم بانه بذل مجهود يستحق عليه التقدير بجد يا اصحابي كانت تجربة جميلة اني اعيش في الجو ده واتعامل مع الناس دي احس بيهم واحاول اسعدهم
حبايبي اصحابي وصاحباتي
لو في ايديكم (وانا عارفة انكم تقدروا) تسعدوا يتيم او محتاج ما تتأخروش....ما تفكروش وبلاش نظرية الاسمها ايه دي اللي الراجل قال عليها
ولو مش عايزين تتبرعوا في صندوق تبرعات كل واحد منكم يدور جنبه في منطقته....عن يتيم أو محتاج يساعده بنفسه.... وزي ماما وفاء ما بتعمل من غير ما يحسسه باحتياجه
اللي عنده وقت (وانا عارفة ان عندكم وقت كتير ..على يدي بتقضوه عالنت) يروح لاي دار ايتام مش مهم يدفع كام مش مهم يدفع اساساً..كفاية يقعد معاهم شوية يلعب معاهم .....يعلمهم واكيد هيتعلم منهم
اصحابي
ماتتصوروش المتعة اللي هتحسوا بيها وانتم بتسعدوا يتيم او محتاج ده غير الثواب يا ولاد الايه
الا ما تعرفوش في برايز هتخش الجنة ولا لأ....!!؟
اشوفكم بكرة