يوميات بريزة فضة..8

يوميات بريزة فضة 8

ورررررررررر..................جعتلكم تاني

بريزة .......عزيزة ............ لذيذة

ومعاكم حصرياً يومياتي

يوميات بريزة فضة
حبايبي اصحابي وصاحباتي
اشكر كل من اتصل بالاسعاف وساعد في انقاذي بعد ماكنت هاختفي جوه جسم المريض!! (راجع اليومية السابقة)
والنهاردة وبعد ما خرجت بالسلامة جاية احكيلكم

*
خد بالك يا خفيف مش كل الابيض نضيف

*
فقت م الغيبوبة اللي دخلت فيها بعد سقوطي وسط الدم في غرفة العمليات

أبص على منى ..... مافيش منى الممرضات... ما فيش ممرضات
لقيت نفسي في كيس بلاستيك مقفول عرفت بعد كدة اني بقيت حرز

آه والله انتم مش مصدقين
بريزتكم الفضة الغضة الجميلة بقت حرز
اتاري الموضوع كبر والراجل قدم بلاغ في القسم وطلعوني بعد عملية تانية واعتبروني اداة الجريمة !!.....وحرزوني
والدكتور الكبير اتعملت له قضية وخرج بكفالة في انتظار محاكمة
المهم بعد كام يوم وانا مركونة عالرف جوة الكيس البلاستيك في مخزن الأدلة الجنائية وجنبي شحنة بودرة من هنا ودولارات متهربة من هنا وحاجات اروح انا جنبيها فين
انا يدوب بريزة فضة غضة جميلة
فوجئت بخطاوي بطيئة ماشية في الضلمة وعلى ضوء كشاف صغير بدأت اشوف ملامح الشخصية المتسللة وما كانش صعب اني اعرف انه حرامي شكله حرامي نفس ملامح الحرامية اللي بيطلعوا في التليفزيون لأ ولابس مخطط ابيض في اسود يعني هية ناقصة
وكان خوفي بيزيد كل ما النور يقرب للرف اللي انا فيه وفجأة وقف وايده اتمدت ......و
طبعاً متوقعين ايه اللي حصل انه هياخد الكيس اللي فيه الدولارات الشنطة اللي فيها البودرة ....ال
الغريب انه خدني أنا الأغرب ان ايده كانت بترتعش وبيقول بصوت خافت سامحني يا رب !!..مش عارفة ليه حسيت انه غلبان
طلعني من الكيس وحط الكيس مكانه بصراحة انا مافهمتش الموقف ده مسكني بايده؟؟ امال حرز ايه وقضية ايه وللا اللي بنشوفه في الافلام غير الحقيقة
طيب مش ده حرامي برده ليه ما خدش الحاجات الغاليه
اكيد الموضوع ده فيه انّه
وزي ما دخل ... خرج وسمعته بعد ما بعد عن المكان بيتصل بشخص وبيقول له الامانة معايا يا باشا وزاد قلقي
وصاحبنا حطني في جيبه وشاور لتاكسي وكفاية مفاجآت بقى !!!!...قال له قسم عابدين يا اسطى
انا حسيت اني باحلم فاقدة الوعي جوه جسم المريض وباخترف في حاجة مش طبيعية حد يقول لي في ايه؟؟
الاول الاقي نفسي بقيت حرز وبعدين حرامي يسرقني ويسيب الدولارات واخيراً طالع على قسم البوليس
فقت من خترفتي على الحرامي وهو بينزل من التاكسي وداخل عالقسم
الله ..... ده الموضوع بجد بقى
وقف قدام مكتب وسأل العسكري على حسام باشا وقال للعسكري قول له التايب ودخل لحسام باشا وطلعني من جيبه وحطني فوق المكتب قدام حسام باشا وقال له تحت امرك يا باشا بس أمانة عليك ما تكلفني بحاجة زي دي تاني !!...انا ما صدقت تبت ياباشا الله..... الموضوع بدا يحلو
وحسام باشا شخط فيه وقال له حاجات ما قدرش اقولهالكم لأ ووصلت انه قام ورفع ايده وقبل ما تنزل على وش التايب والتايب صرخ بأعلى صوته بريزة
وعشان ما تتوهوش مني انا هاقولكم عاللي انا قريته في ملف التحقيق بعد كدة
حسام باشا ده كان ظابط فاسد اتفق مع سعادة الدكتور الكبير على سرقة اداة الجريمة (اللي هية حضرتي) وبكدة تبوظ القضية كلها "وما كانش قدامه غير "التايب هوه اسمه كده.... التايب
بعد ماكان اشهر حرامي في المنطقة ربنا تاب عليه واتعرف باسم التايب وحسام باشا هدد التايب بتلبيسه قضية سقع لو مانفذش طلباته وسرق له دليل ادانة الدكتور ولما كان التايب تاب بجد بلغ عن حسام باشا واتراقب الباشا في بيته .... في مكتبه.... وكل تليفوناته واتسجل له حوارات مع الدكتور وهو بيطمنه ان الموضوع في ايده وديتها يومين ويخلص وما كانش فاضل بعد كدة غير ان التايب يسبك دوره ويروح يسرقني فعلاً ويسلمني للظابط عشان يقدروا يقبضوا عليه متلبس ....و بريزة
كانت هيه دي الاشارة المتفق عليها وانا اللي افتكرته بيستنجد بيّا
دخل الظباط من كل مكان وقبضوا على حسام أفندي وقبل ما يخلوا المكان التايب كان سرق آخر سرقة في حياته سرقني من على ترابيزة حسام أفندي وحطني في جيبه مش عارفة ليه بس مش مهم بجملة الحاجات الغريبة اللي حصلتلي في اليومين دول
واستغرابي ما طولش كتير
عند أول جامع التايب طلعني من جيبه وبص لي بصة صافية وابتسم !!..وحطني في صندوق الصدقة أصحابي
!!!..لو حد منكم حرامي !!!...قصدي يعني لو حد فيكم نصاب يييه لو حد فيكم عمل ذنب كبير
عشان خاطري لو كان ليه عندك خاطر توب ومهما يحصل ماترجعش عن توبتك وربنا مش هيسيبك
وربنا ما يرميكم في ضيقة حد ييجي يطلعني من الصندوق
واشوفكم بكرة